Mord em Knurres

Die Kurzgeschichte "Mord im Kühlschrank" (aus der Sammlung "Henkerstropfen") wurde ins Kölsche übersetzt von Sandra Drack

Jesses, wo ben ich he? Huh, frisch es et ävver och. Ich wäde mer doch nit noch der Charakter verköhle. Am Engk krije ich och noch der Dodderschnuppe ov de Vugelsgripp. Un düster es och!

Hallo? Kann mich ene hüre?

Jrad wor ich doch noch en däm bequäme Päckelche met dä ander Eier. Dann ben ich janz doll durchjeschöddelt wode un dobei muss ich dann en Ohmaach jefalle sin.

Es do einer? Ich dun keinem jet Schläächtes! Ich ben e nett Ei.

*

Boh! Wat wor dat dann jrad för e doll Leech? Ich daach, ich künnt der Himmel sinn! Un dann die riesige, ich weiß nit, wie ich et nenne soll, „Hand“? Jo, esu heiß dat, jetz erinnere ich mich, „Hand“. En riesije Platschhand, die aan mir vörbeifloch und dat Nohbers-Ei jenomme hät. Wat die wal domet deit? Bestemmp erlevv dat jetz jet janz Jroßaatijes. Ävver woröm nimmp die Hand nit mich? Ich muss dat Ei unbedingk ens froge, wie et wor, wann et jlich zeröckkütt.

Dä! Die Tür jeit jo ald widder op! Dismol weed die Milchtüt jenomme. Jetz weed se hingestallt. Do drüvven es och dat Ei! - Ävver. Dat es jo bloß de Schal. - Un do en der jroße, runde Form, es dat…? Ach, do deckes Ei!

Woröm mäht die Hand esujet? Wat hat dat Ei ehr jedon? Et hät doch brav he jesesse, jenau esu wie ich? Ävver wat weiß ich ald? Villeich hät et sich schlääch benomme? Dat muss et sin! Woröm söns dät sujet passere? Ich bin e nett Ei, mir passeet ald nix. Ich setze he, ben brav, immer schön rund un fründlich. Kei Problem, dat krijje ich hin.

Die Milchtüt hät jesaat, dat Ei hät nit lang ligge müsse. Sei hädden tirek donevvejestande. Ehr es bloß e bitzje Milch avjenomme woode, ävver söns jeit et ehr jot. Se föhlt sich jetz sujar vill leichter un beschwingter wie vörher. Ich finge die Milch jo jetz jet ze mager.
Dat jroße Runde wor wal en Pann, un die es janz, janz heiß. Wenn mer eesch ens dren is, soll et em eeschte Momang nor janz leich kribbele, ävver dann jeit et einem anjeblich durch un durch.

Naja, ich ben brav, mir weed die Hand nix dun.

„Wie heiß do dann, do Schwadlappe vun enem Ei?“

Wo kütt dann die Stemm her?

Wä quatsch do? Bes do dat, Hand?

„Domme Verzäll! Ich ben et, die Blotwoosch. Us Kölle. Minge Name es Flönz. Un wä bes do?“

Ich ben e Ei, ich han keine Name.

„Dann heiß do Zimmermän“, säht die Kölsche Blotwoosch.

Wiesu dat dann?

„All Eier heiße Zimmermän“ säht die Blotwoosch und laachten dreckelich.

*

Ich han mich jo met dä Bacon Brothers angefründ, die mir jäjenüvver en der Packung lije – also, wann de Dür zo es. James, Nickey, Sean un Richey. Richey is ävver op eimol verschwunde un zickdäm nit widder opjetauch. Dodrüvver welle die andere nit spreche. Die Blotwoosch meint, Bacon wör bloß e ander Woot för Fröhstöcksspeck. Dat hädden se en der Metzjerei metkräje.Ich jläuve der kei Woot! Se es luuter schlääch drop, weil die Hand jeden Daach e Deil vun ihr avschnigg. Die hät et ävver och verdeent. Die Bacon Brothers sagen dojäjen nie jet Schläächtes üvver die Blotwoosch. Fleisch muss zesammehalde, meinten se, dat wör schon immer su jewäs. Met mir däten se och bloß spreche, weil ich us enem Hohn kumme. Ävver Gemös beaachten se janit. Dobei es dä Broccoli ne janze Leeve.

*

Die Hand hät Nicky un Sean jehollt! Zoeesch es de janze Packung verschwunde, un ich daach ald: Jetz es et met uns all us. Doch dann kom se widder zeröck. Dä James hät zickdäm kei Woot mih jesaht. Ich dät esu jän bei in erüvver en de Packung dötze. Irjenswie han ich dat Jeföhl, mir zwei däte wunderbar beienander passe. Mir zwei un die Botter, zwesche uns herrsch de richtije Chemie. Dat spüren ich.

*

De Eier nevven mir heiße Zimmermän 2 un Zimmermän 3 - hät die Blotwoosch beschlosse. Dat jefällt keinem vun uns. Ävver lang mäht dä fresche Zibbel uns keine Ärjer mih! Mer singe, för uns jäjesiggich Mot ze maache. Klingeling, klingeling, hier kommt der…

Dä James jefällt mer immer besser. Jetz, wo hä allein en der Packung litt, ka’mer in besser sinn. Sing Marmorierung es vill, vill schöner wie die vun dä gekläute Bacon Brothers. Ov Ei un Bacon eines Daachs zesammefinge künne? Wenn die Hand däm James jet andeiht, kritt se et met mir ze dun. Dann schwillt mir der Dodder, dann flock mi Eiwieß us, dann wäde ich zom Kampf-Ei. Do kenne ich dann nix. Ich kann och anders!

*

Ich bin et letzte Ei. Zimmermän 2 un 3 sin zesamme jekidnäpp wode. Wie de Dür op wor, kunnt ich sinn, dat se en ener jroße Kump geland sin – ohne Schal! Janz nackelich. Donoh komen Milch un Botter dozo, bevör die Hand met nem riesije silverne Dinge alles durchjemölsch hat! Ich hoffe, die zwei moote nit ligge.

Ich föhlen mich janz allein he.

Et es och keiner mih do för metzosinge.

Bloß dä Färvfilm en der Eck es immer jot drop. Hä freut sich ald op de Ferie, hät’e jesaht.

*

Die Hand hät neu Eier nevven mich en die Kuhle jesatz. Weil die Blotwoosch nit mih do es, han ich denne Name jejovve. Flönz 1 bes 6. Ich bin jetz et ältste Ei, dat es mi Rääch. Die jung Eier maache Wetze op ming Koste. Ming Rejistrierungsnummer wör total untrendy, un üvverhaup wör Frische et Hippste för Eier. Mi Haltbarkeitsdatum wör och ald bal üvverschredde un ich e voll uncool Jrufti-Ei.

Nä, die Eierjugend vun hück, unverschämp, un en laxe Moral! Rieve luuter ehr Schale aanenein und wundere sich dann, wann se Salmonelle krijje.

Ich bin noch e anständich Landei!
Mir jefällt et he nit mih.
Ich well zeröck en et Hohn.

*

Die Hand hät dä James jehollt!
Et jingk alles janz flöck. Hä wor tapfer, hät nit jekresche, wie et passeet es. Im jingk et zoletz suwiesu nit mih esu jot. En Eck vun im wor unbedeck jeblevve, un hä es do stief jewode. Hät späder nix mih en singem Fettrand jespürt. Dat es unanjenehm för ene Bacon.

Mir hädden esujet jo nix usjemaat, e jot Ei steiht zo singem Jeföhl, och wann der Rand hatt weed.

Dann kom die Hand widder, un ich han dä James en der Pann jesinn. Hä dät sich krümme un zesammetrecke. Ich kunnt janit hinlore! Do han esujar die jung Dodderdinger opjehöt ze schwade, sujet hatten se noch nie sinn müsse. Wenn die ens älder sin, dann weed inne schon klor wäde, dat ich rääch hatt. Met allem. Ävver als jung Ei weiß mer jo immer alles besser. Do denk mer noch, dä janze Knurres steiht einem offe.

Jetz hät die Hand et halve Öllich jehollt. Dat hät jestunke un wor total introvertiert. Jot, dat dat fott es – ävver wat es, wann it jetz bei der James en de Pann kütt? Hä kunnt se och nit ligge - Jemös evvens. Dat kann die Hand im doch nit aandun! Hä es doch su ene nette Bacon. - Minge Bacon.

Do es die Hand ald widder!

Wä hollt se dann jetz? Se kütt immer nöhter, se nimp bestemmp eins vun dä jung, fresche Eier - Haltbarkeit es doch esu wichtich.

Ach, do hillije Höhnerkacke!

Se kütt bei mich, se pack mich aan, se hivv mich erus! Hölp! Hölp mer doch! Färvfilm!

Se lort mir vun hinger op die Rejistrierung.
Nä, wo ich doch esu schenant ben!
Jetz ben ich drusse.

Boh, he es jo alles esu hell, un do sin jo esujar Belder vun Höhner am Finster. Die Hand mach Höhner! Dann mach se bestemmp och Eier! Wä Höhner ligge kann, dä deit doch keinem Ei jet!

Uh. Mir weed et schwindelig.
Dat jeit esu flöck eraf, en Richtung Pannekant.
Au!
Oh!
Aaaah…

Ich föhle mich rack su bläck.

Nä, frei! Ich fleeße doher, endlich kann ich mich jon loße! Deef en mir wor ich wal immer e FKK-Ei.

Un do es jo och dä James. Ich fleeße bei in, ömkreise singe krosse Baconrand. Mer zwei wäde eine. Hä föhlt sich jot aan un süht zom aanknabbere us.

Oh, jetz weed et heiß – ich verfestije mich, un wieß wäde ich och noch - et Levve dämp us mir erus! Die Hand brängk mich wirklich öm! Wat han ich ehr bloß jedonn? Wor ich dann nit immer e leev Ei? Selvs met däm Jemös han ich av un aan e Schwätzje jehalde!

Mörder! Eier-Killer!

Die Hand hö’t mich nit, se streut bloß e wieß, jriselich Zeuch op mich, dat dä letzte Ress Flüssigkeit us mir erustrick.

Quälerei! Folter!

Et jitt bloß eine Jedanke, dä mich dat all he erligge lieht – ich ben zosamme met mingem James. Un mer passe esu jot zosamme, dat föhlen ich deutlicher wie vörher.

Oh, die verdammpte Hetz! Mir weed janz kross!

Du verdammpte Hand…

Der einzije Trus es: Wann ich jetz afnippele, dann winnichstens zesamme met däm James.

Ich schlonn Blose!
Ich schlonn Blose!

Doch ich han noch en Üvverraschung! En filuije, kodde Üvverraschung för die Hand. Ich wäde dä James un mich räche! Un zwor met däm scharfkantije Stöck Schal, dat ich evvens metjeresse han!

Kumm nöhter, Hand, kumm nöhter!